Die ANC het die afgelope week weer gewys dat die party nie kleinsake-ondernemings wil ondersteun nie. Sy lede op die portefeuljekomitee oor staatsdiens en administrasie het geen belangstelling getoon om die DA se voorgestelde wet op dié kwessie te ondersteun nie.
Die “Ease of Doing Business“-konsepwet is in Februarie vanjaar deur die DA ter tafel gelê in die Parlement en beoog om die uitdagings wat Klein, Mediun, en Mikro-Ondernemings (KMMO’s) in Suid-Afrika ondervind, aan te spreek.
Die regering moet die omgewing waarin KMMO’s hulself bevind, meer besigheidsvriendelik maak.
Rompslomp en swak dienslewering vanaf die regering is van die vernaamste aspekte wat dringend aangespreek moet word vir die behoud van ons KMMO’s.
Die wetsontwerp fokus op vier belangrike beginsels, naamlik:
- om die ANC-regering se verdrukkende en sistemiese beperkings op besighede te oorkom;
- die versekering van ʼn alomteenwoordige besigheidsvriendelike omgewing in Suid-Afrika;
- die daarstelling van ʼn gelyke speelveld vir almal; en
- die vermindering van rompslomp wanneer interaksie met die staat plaasvind.
Hierdie beginsels word wêreldwyd aanvaar as van die beste opsies om ʼn besigheidsvriendelike omgewing vir KMMO’s daar te stel.
KMMO’s is die oplossing vir ekonomiese groei en standhoudende werksgeleenthede vir alle inwoners van Suid Afrika te verseker.
Dit is daarom belangrik dat die goedkeuring van die wetsontwerp met meer dringendheid en noodsaaklikheid benader moet word.
Die DA sien uit na die dag wanneer die ANC hul party se belange opsy kan skuif ten gunste van die kleinsake-gemeenskap.